حوزہ نیوز ایجنسی کی رپورٹ کے مطابق، اسلامی جمہوریہ ایران نے خلائی صنعت میں ایک اور اہم کامیابی اپنے نام کرتے ہوئے آج علی الصبح سلمان نامی مقامی لانچر کے توسط سے جدید ترین حیاتیاتی کیپسولز کو مکمل کامیابی کے ساتھ خلاء میں بھیج دیا ہے۔
رپورٹ کے مطابق، یہ بائیو کیپسولز انسانوں کو خلاء میں بھیجنے کے روڈ میپ کو سمجھنے کیلئے ایک سائنسی، تحقیقی اور تکنیکی کارگو ہے، جسے زمین کی سطح سے 130 کلومیٹر کی بلندی پر لانچ کیا گیا ہے۔
تفصیلات کے مطابق، اسلامی جمہوریہ ایران کے جدید ترین بائیو اسپیس کیپسولز کو وزارتِ دفاع اور مسلح افواج کے اشتراک سے تیار کردہ سلمان نامی مقامی لانچر کے ذریعے کامیابی کے ساتھ خلاء میں بھیج دیا گیا ہے۔
500 کلو گرام وزنی کیپسولز کے کامیاب لانچ کے ساتھ ہی خلائی مشن کے منصوبے کی مختلف ٹیکنالوجیز بشمول لانچنگ، ریکوری کی ترقی اسپیڈ کنٹرول سسٹمز اور امپیکٹ شیلڈز، کیپسول اور چھتری کے ایروڈائنامک ڈیزائن، حیاتیاتی حالات کے کنٹرول اور نگرانی سے متعلق نظام وغیرہ کا بھی کامیابی سے تجربہ کیا گیا۔
"سلمان" نامی یہ کیپسول لانچر، اس دور کا پہلا ورژن ہے، جو آدھا ٹن وزنی حیاتیاتی کیپسولز لانچ کرنے کی صلاحیت رکھتا ہے اور اسے مکمل طور پر ایران نے ہی بنایا ہے۔
یہ بات بھی قابلِ ذکر ہے کہ مذکورہ کامیاب تجربے کے بعد، اسلامی جمہوریہ ایران اب بائیولوجیکل کیپسولز کے حامل 6 ممالک کی صف میں شامل ہو چکا ہے۔
